Во црⷭ҇твїи твое́мъ помѧнѝ на́съ, гдⷭ҇и, є҆гда̀ прїи́деши во црⷭ҇твїи твое́мъ.
Бл҃же́ни ни́щїи дꙋ́хомъ, ꙗ҆́кѡ тѣ́хъ є҆́сть црⷭ҇тво нбⷭ҇ное.
Бл҃же́ни пла́чꙋщїи, ꙗ҆́кѡ ті́и ᲂу҆тѣ́шатсѧ.
Бл҃же́ни кро́тцыи, ꙗ҆́кѡ ті́и наслѣ́дѧтъ зе́млю.
Бл҃же́ни а҆́лчꙋщїи и҆ жа́ждꙋщїи пра́вды, ꙗ҆́кѡ ті́и насы́тѧтсѧ.
Бл҃же́ни млⷭ҇тивїи, ꙗ҆́кѡ ті́и поми́ловани бꙋ́дꙋтъ.
На
и҃
Снѣ́дїю и҆зведѐ и҆з̾ раѧ̀ вра́гъ а҆да́ма: крⷭ҇то́мъ же разбо́йника введѐ хрⷭ҇то́съ во́нь, помѧни́ мѧ, зовꙋ́ща, є҆гда̀ прїи́деши во црⷭ҇твїи твое́мъ.
Сті́хъ: Бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.
Покла́нѧюсѧ стрⷭ҇те́мъ твои̑мъ, славосло́влю и҆ воскр҃се́нїе со а҆да́момъ и҆ разбо́йникомъ, со гла́сомъ свѣ́тлымъ вопїю́ ти: помѧни́ мѧ гдⷭ҇и, є҆гда̀ прїи́деши во црⷭ҇твїи твое́мъ.
Сті́хъ: Бл҃же́ни миротво́рцы, ꙗ҆́кѡ ті́и сн҃ове бж҃їи нарекꙋ́тсѧ.
Распѧ́лсѧ є҆сѝ безгрѣ́шне, и҆ во гро́бѣ положи́лсѧ є҆сѝ во́лею: но воскрⷭ҇лъ є҆сѝ ꙗ҆́кѡ бг҃ъ, совоздви́гнꙋвый себѣ̀ а҆да́ма, помѧни́ мѧ, зовꙋ́ща, є҆гда̀ прїи́деши во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Хра́мъ тво́й тѣле́сный тридне́внымъ воскр҃си́вый погребе́нїемъ, со а҆да́момъ, и҆ и҆̀же ѡ҆ а҆да́ма, воскр҃си́лъ є҆сѝ хрⷭ҇тѐ бж҃е: помѧнѝ на́съ зовꙋ́щихъ, є҆гда̀ прїи́деши во црⷭ҇твїи твое́мъ.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Хра́мъ тво́й тѣле́сный тридне́внымъ воскр҃си́вый погребе́нїемъ, со а҆да́момъ, и҆ и҆̀же ѡ҆ а҆да́ма, воскр҃си́лъ є҆сѝ хрⷭ҇тѐ бж҃е: помѧнѝ на́съ зовꙋ́щихъ, є҆гда̀ прїи́деши во црⷭ҇твїи твое́мъ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆жденꙋ́тъ, и҆ рекꙋ́тъ всѧ́къ ѕо́лъ глаго́лъ на вы̀ лжꙋ́ще менѐ ра́ди.
Мѷронѡ́сицы прїидо́ша пла́чꙋщѧ, на гро́бъ тво́й хрⷭ҇тѐ бж҃е, ѕѣлѡ̀ ра́нѡ: и҆ въ бѣ́лыхъ ри́захъ ѡ҆брѣто́ша а҆́гг҃ла седѧ́ща, что̀ и҆́щете; зовꙋ́ща. воскр҃се хрⷭ҇то́съ, не рыда́йте про́чее.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
А҆пⷭ҇ли твоѝ гдⷭ҇и на го́рꙋ, а҆́може повелѣ́лъ є҆сѝ и҆̀мъ, прише́дше сп҃се, и҆ тѧ̀ ви́дѣвше поклони́шасѧ и҆̀ хже и҆ посла́лъ є҆сѝ во ꙗ҆зы́ки ᲂу҆чи́ти и҆ крести́ти ѧ҆̀.
Сла́ва ѻ҆ц҃ꙋ̀, и҆ сн҃ꙋ , и҆ ст҃о́мꙋ дх҃ꙋ.
Ѻ҆ц҃ꙋ̀ поклони́мсѧ, и҆ сн҃а славосло́вимъ и҆ прест҃а́го дх҃а вкꙋ́пѣ воспои́мъ, зовꙋ́ще и҆ глаго́люще: всест҃а́ѧ трⷪ҇це, сп҃сѝ всѣ́хъ на́съ.
И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.
Мт҃рь твою̀ приво́дѧтъ ти́ въ мл҃твꙋ, лю́дїе твоѝ хрⷭ҇тѐ: мольба́ми є҆ѧ̀ щедрѡ́ты твоѧ̑ да́ждь на́мъ бл҃гі́й, да тѧ̀ прославлѧ́емъ, и҆з̾ гро́ба на́мъ возсїѧ́вшаго.