Во црⷭ҇твїи твое́мъ помѧнѝ на́съ, гдⷭ҇и, є҆гда̀ прїи́деши во црⷭ҇твїи твое́мъ.
Бл҃же́ни ни́щїи дꙋ́хомъ, ꙗ҆́кѡ тѣ́хъ є҆́сть црⷭ҇тво нбⷭ҇ное.
Бл҃же́ни пла́чꙋщїи, ꙗ҆́кѡ ті́и ᲂу҆тѣ́шатсѧ.
Бл҃же́ни кро́тцыи, ꙗ҆́кѡ ті́и наслѣ́дѧтъ зе́млю.
Бл҃же́ни а҆́лчꙋщїи и҆ жа́ждꙋщїи пра́вды, ꙗ҆́кѡ ті́и насы́тѧтсѧ.
Бл҃же́ни млⷭ҇тивїи, ꙗ҆́кѡ ті́и поми́ловани бꙋ́дꙋтъ.
На
и҃
Помѧнѝ на́съ, хрⷭ҇тѐ сп҃се мі́ра, ꙗ҆́коже разбо́йника помѧнꙋ́лъ є҆сѝ на дре́вѣ: и҆ сподо́би всѣ́хъ є҆ди́не ще́дре, нбⷭ҇номꙋ црⷭ҇твїю твоемꙋ̀.
Сті́хъ: Бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.Слы́ши а҆да́ме, и҆ ра́дꙋйсѧ со є҆́ѵою: ꙗ҆́кѡ ѡ҆бнажи́вый пре́жде ѻ҆боѧ̑, и҆ пре́лестїю взе́мъ ва́съ плѣ́нники, крⷭ҇то́мъ хрⷭ҇то́вымъ ᲂу҆праздни́сѧ.
Сті́хъ: Бл҃же́ни миротво́рцы, ꙗ҆́кѡ ті́и сы́нове бж҃їи нарекꙋ́тсѧ.На дре́вѣ пригвожде́нъ бы́въ сп҃се на́шъ во́лею, ꙗ҆́же ѿ дре́ва клѧ́твы а҆да́ма и҆зба́вилъ є҆сѝ, воздаѧ̀ ꙗ҆́кѡ ще́дръ є҆́же по ѡ҆́бразꙋ, и҆ ра́йское селе́нїе.
Сті́хъ: Бл҃же́ни и҆ згна́ни пра́вды ра́ди. ꙗ҆́кѡ тѣ́хъ є҆́сть црⷭ҇тво нбⷭ҇ное.Дне́сь хрⷭ҇то́съ воскр҃съ ѿ гро́ба, всѣ̑мъ вѣ̑рнымъ подаѧ̀ нетлѣ́нїе, и҆ ра́дость ѡ҆бновлѧ́етъ мѷроно́сицамъ по стрⷭ҇ти и҆ воскрⷭ҇нїи.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.Ра́дꙋйтесѧ мꙋ̑дрыѧ жєны̀ мѷронѡ́сицы, пє́рвыѧ хрⷭ҇то́во воскрⷭ҇нїе ви́дѣвшѧ, и҆ є҆го̀ возвѣсти́вшѧ а҆пⷭ҇лѡмъ, всегѡ̀ мі́ра воззва́нїе. Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Дрꙋ́зи хрⷭ҇тѡ́вы а҆пⷭ҇ли ꙗ҆́вльшесѧ, сопресто́льни є҆гѡ̀ сла́вѣ бы́ти и҆мꙋ́ще, со дерзнове́нїемъ томꙋ̀ на́мъ предста́ти, ꙗ҆́кѡ ᲂу҆ч҃нцы̀ є҆гѡ̀ моли́тесѧ.
Сла́ва ѻ҆ц҃ꙋ̀, и҆ сн҃ꙋ , и҆ ст҃о́мꙋ дх҃ꙋ.
Безнача́льнаѧ трⷪ҇це, нераздѣ́льное сꙋщество̀, сопрⷭ҇то́льнаѧ є҆ди́нице, є҆диноче́стнаѧ сла́вою, пренача́льное є҆стество̀ и҆ црⷭ҇тво, сп҃са́й и҆̀ же вѣ́рою воспѣва́ющихъ тѧ̀.
И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.
Ра́дꙋйсѧ, бж҃їе простра́нное вмѣсти́лище: ра́дꙋйсѧ, ковче́же но́вагѡ завѣ́та: ра́дꙋйсѧ, рꙋ́чко, и҆з̾ неѧ́же ма́нна всѣ̑мъ даде́сѧ нбⷭ҇наѧ.